crazy people...

...aber voll

also was mer da unne noed alles fuer luet xeht, unglaublich. die kaenned echt nuet, leged a was ihne gad passt, und au waenns eigentlich vode zaemesetzig noed passt, legedses glich ah... oeb raege oder sunne... daenke das isch en punkt wo mir schwiizer eus no choennted e grossi schiebe abschniede. da wird mer au noed bloed agluegt oder weiss ich was... :)

aber gnau so usgflippt wies sind, gnau so hilfsbereit sinds au... also waenn de bus volle isch, und es stiegt en alte herr oder e alti dame, stoend denn die junge sofort uf und mached platz.! weiss ja noed waenni das in zh oder susch wo z'letst xeh han... wobii ich weiss au nueme waenn ich z'letst in zueri tram gfahre bin... heehee aber au waenn mer de australier uf de strass nach oepisem froegt, die naemd sich wuekli ziit (klar gits au die ohni ziit) und helfed eim... was halt isch, sie reded gern luut, weiss noed oeb das am englisch lieht aber waemer oeper (chunnt ja au no chli ufd person druf ah) anere rote ample froegt, weiss nacher so zimli jede wo am warte xii isch was ich sueche... hehee, also so isch es mir letsti ergange... :)

was es natuerlich au bi 4,4 millione iwohner git isch e gwuessi armuet, und die xeht mer uf de strasse... aber ich daenke das isch i jedere grossstadt so! aber es waer noed so das die luet sich irgendwie brutal negativ uffuehred oder susch was...

da chunnt mer gad e lustigi gschicht in sinn wo mer die wuche passiert isch: ich bi am abig id stadt und bi mal chli dur d'strasse gschlaenderet... ploetzlich chunnt eini zu mir miteme riese lache. nacher verzellt sie mer sie gfindi ihres auto nueme, sie hegis taxdur innes parkhuus gstellt und findi's nueme. uf das abe haemer denn beid mal chli muesse schmunzle... :) sie haet denn au chli hochduetsch gred, aber nur broche. uf all faell froegt sie mich oeb ich echt noed en $ hegi fuer sie fuer e schlafstell... klar han ich denn mis muenz zaeme gno und ihre 70 cent geh, han gad noed meh muenz gha... sorry lady... uf all faell hani kei ahnig oeb das nur es rolle spiel xii isch vo ihre oder oeb sie ihres auto wuekli nueme gfunde haet (vode chleider her haets noed nacheme rollespiel usxeh), sie haet scho xeit sie segi vo melbourne cho u.s.w... also glaub ichs ihre jetz mal:)

ja das waer mal so de ersti idruck xii... hoffe ich han eui wartezit chli entschaedigt!? :) und waenn er susch e frag haend choennder ja mal schriebe... ;) mached guet und bis bald...