my first week in sydney...

...hello everybody

ja so isches, mini erst wuche ghoert jetz denn de vergangeheit a. schnell ischs verbii, eigentlich... klar gits au die moment wos eim lang vor chunnt, aber das isch glaub ueberall chli so... :)
ihr froeged eu sicher was ich denn die ganz wuche mach. also die wuche bini so zimli jede tag id stadt, mal det hii, mal det hii... zum teil ziellos und maengmal glich mit gwuesse absichte. und au waenn die absichte oder ziel noed immer gad erreicht worde sind, ischs en tag spoeter denn tatsach worde... ;)

wie zum bispiel gester, xuecht hani e sprach schuel... gfunde hani 3, allerdings gschlosseni... ha wohl glich chli z'lang gha zums gfinde, aber ich han ja de ziit. wenigstens hani gwuesst wos sind und bin den huet nomal verbii, allerdings bini gad bide erste "hange bliebe"... ;) haend mer gad en test geh zum usfuelle, und siehe da, de letsti platz hani gad no becho... das heisst: ab em maentig (13-11-06) druck ich sit langem wiederemal d'schuelbank! das fuer 2 wuche jewils vom 9:15am bis am 12:15pm (23:15h bis 2:15h MEWZ)... waehrend ihr am schlafe sind bin ich denn heimlich am englisch lerne... heehee

i was fuere zit laeb ich eigentlich? i de gliche wie ihr, nur bin ich 10 stund vorus --> MEWZ plus 10h!
waenn ihr oepe ufstoend, gang ich no lang noed go schlafe, und waenn ich ufstahn goend ihr oepe is bett... jetz choennd ihr eu mini "wake up" und bettzite saelber usmale! ;) wobii sich die ab naechst wuche sehrwarschindlich wieder chli aendere werdet, aber isch scho guet so... git chli en gregletere tagesablauf als jetz... :)

apropo ufstah und is bett gah, han eu ja nonig mal vo mine zimmer "kompane" verzellt... also am afang isch no es schottischs paerrli drin xii, mit dene bini denn au ab und zue underwex xii, aber die z'verstah isch no recht schwer xii, haend en recht haerte akzent gha. aber mit haend und fuess isch denn alles gange. :) die sind denn aber mitti wuche witer gange... und daenn wer da no de neu seelaender wo urspruenglich vo china isch, also sini eltere sinds und somit xeht's mer ihm au ah! :) de isch anschienend scho sit 3 moenet da, schafft und schlaft... entweder isch er am schlafe oder denn am schafe als baecker, aber isch ganz en flotte... huet haemer en internationale waeschtag gha, sind gad glichzitig go waesche. und ja, die wo jetz mit bloede spruech waennd cho, ja ich ha mini chleider no und nei sii sind mer noed z'chlii... heehee

aja, han ich eu scho xeit wer ich die wuche xeh han? heehee, jetz aber: ricky ponting!!! seit eu noed viel? isch mer au so gange... heehee, das isch de captain vode australische cricket mannschaft! da stuuneder hae? =) er haet e autogrammstund geh voreme ichaufszenter... laeck wie die luet agstande sind! oepe 60 meter lang isch die schlange xii, und oepe 2 mal unterbroche, will ja d'luet glich no i anderi laede haend welle (die schlange isch am block entlang, und somit chli unguenstig xii fuerd nachberlaede vom zenter)... ich han de historisch moment denn glich gnuetzt und es foeteli vonem gmacht, au waenn kein schwein weiss wer das isch... :)

also mini liebe, ich wuensch eu mal e schoens weekend und hoffe wieder uf es paar kommentaer us de schwiz, freut mi natuerlich immer wieder... foeteli chani eu leider no kei bringe, chan da unne kei foeteli ufelade, aber sobaldi mal anen moderne laptop chume wirdi d'chance nutze... :) bis bald und bliebed suuber...